1 Macc 12

Inoun Minimin ong Rom oh Saparta

1 Ni Sonadan eh kilang duwen eh ahnsou mwahu eh leledohr, e pilada meninkeder kesempwal kei oh kadaralahng irail Rom, pwe re en onehda sapahl oh kamanahla inou en minimin nanpwungen Rom oh Israel. 2 E pil kadaralahng kisin likou kei Saparta oh wasa teikan ong ni soangen kupwurohte. 3 Meninkeder ko eri lel Rom, irail eri pedolong nan imwen pwihnen wiekupwuro, oh pakairkihong irail me Samworo Lapalap Sonadan, oh mehn Suhs kan kadarirailla pwe re en onehda sapahl inou en ehupene oh miniminpene me re wiadahr mahs. 4 Mehn Rom eri kihong irail kisinlikou pwe re en kihong kepina en wehi kan me re pahn kotehla ar wasa kan, kisinlikou ko peki rehn kepina ko re en sewese meninkeder pwukat pwe re dehr diar apwal ni ar pwurupwuralahng Sudia.

5 Iet audepen pelien kisinlikou me Sonadan ntingihalahng mehn Saparta kan:

6 “Rahnmwahu sang Samworo Lapalap, Sonadan, pwihn lapalap en wehi, samworo kan, oh mehn Sudia koaros, ong riat akan nan Saparta. 7 Ahnsou ehu samwalahr, amwail Nanmwarki Arius ketin kadarodohng at Samworo Lapalap, Onias, kisinlikou ehu me mahsanih me atail wehi riau wet ehupene, nin duwen me pelien kisinlikowo kasalehda. 8 Onias kasamwo sapwellimamwail meninkedero ni wahu mehlel oh sapengalahr audepen kisinlikowo me koasoiepen minimin oh ehupene mi loale. 9 Oh met, mehnda ma se sohte anahne soangen minimin pwukat, pwehki at diarehr kakehlapat nan pwuhk sarawi kan me se tungoalenki, 10 ahpw se men onehda sapahl at minimin oh ehuong kumwail. Se sohte men wiahla mehn liki kei douluhl rehmwail, e inenen reireilahr atail sohla tuhpene. 11 Erein ahnsou reirei wet se sohte tokedihsang at tamataman kumwail nan at tungoal meirong kan oh kapakap akan ni rahn sarawi kan oh rahn teikan me konehng. Pwe ih me konehng aramas emen en kin kapakapki rie. 12 Se pil perenkihda amwail ndandlahr. 13 A duwen kiht, apwal tohto oh mahwen tohto lelohng kiht, wehi kei me kapilkitpene, kahpwalihkitalahr. 14 Ni mahwen pwukat, se sohte men kedirapwahkin kumwail de kompoakepaht teikan, 15 pwehki at patohwan aleier sawas sang Kaun-o, iei ih me ketin kalowehdi at imwintihti kan oh doareikitala. 16 Eri, se piladahr Numenius, nein Antaiokus, iangahki Antipater, nein Sason, oh kadariralahng Rom pwe ira en onehda sapahl at minimin oh ehuong mehn Rom. 17 Se koasoanehdi ira en pil wawohng kumwail at rahnmwahu oh patohwanohng kumwail kisinlikou kiset duwen at onehda sapahl atail miniminpene. 18 Eri, se men kumwail en sapengala audepen kisinlikou wet.

19 “Me pahn sansal pah iei kisinlikou me pekederdohng Onias mahs:

20 “‘Rahnmwahu sang Arius, nanmwarkien Saparta, ong Samworo Lapalap Onias. 21 Se diaradahr kisinlikou kis duwen mehn Saparta oh Suhs arail wia pirien ehu, duwen wehi riau pwukat eh tepidohsang Eipraam. 22 Eri, ni at esedahr duwen ire wet, kumwail kalahngan ntingkidohng kiht duwen iramwail. 23 Duwen kiht, se pahn kadarowohng kumwail pakairpen at men kumwail oh kiht en ahnekipene at dipwisou kan, iangahki nait pelinmen kan oh kepwe teikan koaros, ma kumwail pahn pil wiahiong kiht soahngohte. Se koasoanediongehr at tungoal meninkeder kan en pakairkihong kumwail duwen ire pwukat koaros.”

Mwekid en Mahwen kan en Sonadan oh Saimon

24 Sonadan rongada me sapwellimen Demihtrius sounpei ko pwurodohn mahweniong iangahki karis ehu me kehlail sang mahs. 25 E sohte men mweidohng re en pedolong nan uhdahn wasa me e kakaun, ihme e mwadangete mweselsang Serusalem oh kohla tuhwong irail Amad. 26 E ahpw kadarala lipoahrok kei nan kahnimpwal en imwintihti ko. Irail eri pwurodo pakairkihong me imwintihti ko onopadahr re en mahweniong mehn Suhs nipwongo. 27 Nin soutikpene, Sonadan ahpw ndaiong nah sounpei ko re en kolokol nair kedlahs oh mwasamwasahn mwekid en nipwongo. E pil kihdi sounsilasil kei kapilpene kahnimpwalo. 28 Ni imwintihti ko ar rongada me Sonadan onopadahngehr mahwen, re inenen masepwehkada oh tangdoaui, arail kisiniei kan wie okohkte. 29 Sonadan oh nah sounpei ko kilang ar kisiniei ko ar lullul, ahpw re sasairki dahme wiawi lao lel nimenseng. 30 Sonadan oh nah sounpei ko ahpw pwakihirailla, ahpw e sohte koanoairaildi pwehki ar kotelahr Pillap Eluhderus. 31 Sonadan eri wet kohla mahweniong kisehn mehn Arepia kei me adaneki mehn Sapadea. E kaloweiraildi oh wahsang ar dipwisou kan. 32 Mwuhr, e ahpw kommoaldi oh uhda kohla Damaskus, dawidawih wasa ko kohla.

33 Ni ahnsowo Saimon pil kohla Askelon oh wasahn mahwen kan limwah, e ahpw pil wetlahng Sopa, 34 oh kihdiong sounpei kei wasao pwehki eh rong me aramas ako koasoakoasoane re en pangala wasahn mahwen en Sopa ong sapwellimen Demihtrius sounpei kan.

35 Ni ahnsou me Sonadan pwurodo, e kapokonepene pwihn lapalapo oh wiekupwur ong irail pwe re en kauwada wasahn mahwen kei nan Sudia, 36 re en kailehda kehl kan en Serusalem, oh re en kauwada ehu kehl ile me pahn irepeseng wasahn mahweno oh kahnimwo. Met pahn kahrehda imwintihti ko me mi loale ar pahn sohla kak netiki de pwainda mehkot nan kahnimwo. 37 Aramas ako eri sawaspene ni koadoahkepen kakehlahda wasahn doare kahnimwo pwehki wasa kis ni palikapi peianla Wahun Kidron eh rengkdier oh wasa me adaneki Sapenada anahne kamwahula. 38 Saimon pil onehda sapahl kisin kahnimw Adida ni tepin dohlo. E kelepene oh kihong ewen kehl mete.

Tripo Kalowehdi Sonadan

39 Tripo eri koasoanehdi en uhwong Nanmwarki Antaiokus pwe en kasapwilada pein ih en wiahla nanmwarkien Siria. 40 Ahpw e perki pwe Sonadan de sohte pwungki oh mahweniong pwehn irehdi. Tripo eri kihpene nah karis oh kohla Ped San, e koapworopworki me e kak kalowehdi Sonadan oh kemehla. 41 Ahpw Sonadan pil kohla Ped San, wa sounpei dengngan 40,000. 42 Ni Tripo eh kilangada uwen tohtohn nein Sonadan sounpei, e ahpw masepwehkada oh sohla men mahwen. 43 E ahpw kasamwo Sonadan ni wahu mehlel, kahrehla pwehn tuhwong nah sounkaweid koaros, oh kihong kisakis kei, oh pil koasoanehdi sounkaweid oh sounpei koaros en peikiong Sonadan, duwehte ar kin peikong ih. 44 E ahpw idek rehn Sonadan, “Dahme komw ketikihdohki uwen tohtohn sounpei pwukat nan omwi sohte pahn mahwen? 45 Dahme komw seu kadarkinirailla? Pilada mehte depe en mihmi rehmwi, oh komwi iangiehda ketila Tolemais. I pahn patohwanohng komwi kahnimwo, iangahki wasahn mahwen kan, sounpei kan, oh lapalap akan koaros. Eri, I ahpw pahn pwurala, pwe ni mehlel, iei kahrepe wet me I patohkihdo wasaht.” 46 Sonadan eri kamehlele, oh kapwaiada eh kaweid, e ahpw kapwurehla nah sounpei ko Sudia. 47 E wa kohla sounpei 3,000, ahpw e pwilikihdi me 2,000 nan Kalili, a mehte 1,000 e wahda. 48 Ahpw ni Sonadan eh pedolong nan Tolemais, tohn kahnimwo ritingedi ewen kehlo, poarokedi oh kemehla koaros me iang ih kohla.

49 Tripo ahpw kadarala sounpein dak oahs kei nan Kalili oh Wahun Sesreel pwe re en kemehla luhwen nein Sonadan sounpei ko. 50 Sounpein Suhs ko kihkihong me Sonadan lohdier oh kamakamalahr, iangahki irail ko me iang ih, re ahpw kakehlakahda nan kapehd en emenemen oh mwekidlahng wasahn peio. 51 Ni imwintihti ko ar kilangada me sounpein Suhs ko onopadahr re en mahwen uwen ar kak, re uhdahte pwurala. 52 Sounpein Suhs ko eri pwurala Sudia sohte diar apwal, ahpw re inenen masepwehk. Wehio pwon ahpw mwahieiki Sonadan oh ienge ko pwehki ar kihkihong me re melahr. 53 Wehi kan me kapil irail ahpw song en kamwomwirailla. Re medemedwe me sohte en mehn Suhs kan ar kaun oh sohte ehu wehi me ehuong irail ni ahnsowo, eri, iei ahnsou mwahu en kamwomwirailla oh kasohreirailla douluhl.